Агро-оскуола - тыа хаhаайыстыбатын сайдар кэскилэ

06.02.2018
Количество показов: 19
Олунньу 5 күнүгэр Ил Түмэҥҥэ агро-оскуолалар дириэктэрдэрэ Саха Өрөспүүбүлүкэтин тыа хаһаайыстыбатын миниистирин аска-үөлгэ политикатын солбуйааччы Афанасий Семеновы кытары көрүстүлэр. Көрсүһүүнү наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэт бэрэссэдээтэлэ Антонина Григорьева иилээн-саҕалаан ыытта.
 
Антонина Григорьева агро-оскуолалар үлэлэрин кылгастык сырдатта. «Быйыл биһиги өрөспүүбүлүкэбитигэр агро-хайысхалаах үөрэх төрүттэммитэ 30 сылын туолар. Бүгүҥҥү күҥҥэ барыта 102 агро-оскуола үлэлиир. Ыччаппыт, оҕолорбут тыа хаһаайыстыбатыгар төһөнөн сыстаҕас буола улааталлар да, оччонон тыа сирэ инникилээх. Оҕо кыратыттан үлэҕэ чугас, үлэни өйдүүр буоларыгар бу оскуолалар ыытар үлэлэрэ төһүү күүс буолаллар», - диэн эттэ.
 
Саха Өрөспүүбүлүкэтинтыа хаһаайыстыбатын миниистирин аска-үөлгэ политикатын солбуйааччы Афанасий Семенов агро-оскуолалары нуорма-быраап өттүнэн бөҕөргөтүүгэ, статустарын үрдэтиигэ, үбүлэниилэрин кэҥэтиигэ үгүс үлэ бырабыыталыстыба өттүттэн ыытылларын тоһоҕолоон бэлиэтээтэ. Чуолаан тыа хаһаайыстыбатын министерствота агро-оскуолалары сыллата үбүнэн өйүүрүн эттэ.
 
Көрсүһүүгэ мустубут агро-оскуолалар дириэктэрдэрэ санааларын үллэһиннилэр. В.П. Ларионов аатынан Майа агротехнологическэй уонна политехническэй хайысхалардаах оскуолатын дириэктэрэ Светлана Игнатьева оскуолатыгар 800-тэн тахса оҕолооҕун, үөрэнээччилэр сылгы көрөллөрүн, рассада үүннэрэн олохтоох нэһилиэнньэҕэ атыылыылларын, эмтээх үүнээйини хомуйалларын, тигээйи иитэллэрин кэпсээтэ.
 
Урут-уруккуттан Саха сиригэр оҕуруоччуттарынан сураҕырар Мэҥэ Хаҥалас улууһун Ороссолуода агро-оскуолатын дириэктэрэ Николай Никифоров нүөлсүтэр үлэҕэ тыа хаһаайыстыбатын министерствота грант олохтуура буоллар диэн санаатын эттэ. 
 
Дириэктэрдэр үөрэнээччилэрэ дипломнаах специалист буолан улуустарыгар төннөн кэлэн, тыа хаһаайыстыбатыгар үлэлии сылдьалларыттан үөрэллэрин иһитиннэрдилэр. Тыа хаһаайыстыбатын министерствотыттан көмө ылбатахтара икки сыл буолбутун эттилэр. Инникитин тустаах үлэлии сылдьар агро-оскуолаларга үп-харчы көрүллэрэ буоллар, үлэ тахсыылаах буолуо этэ диэн бэлиэтээтилэр.
 
Афанасий Семенов көрсүһүү түмүгэр агро-оскуолалар нүөлсүтэр үлэҕэ бырайыак оҥорон үлэлэһэллэригэр сүбэлээтэ. Эһиил агро-оскуолаларга куонкурус ыытыллыаҕын иһитиннэрдэ.
 
Ил Түмэн пресс-сулууспата
 
Количество показов: 19