"Оһуохай инники сайдар кэскилэ" диэн төгүрүк остуол саҥа санаалары түмтэ

13.02.2018
Количество показов: 26

Олунньу 10 күнүгэр Саха Өрөспүүбүлүкэтин национальнай художественнай түмэлигэр оһуохай инники сайдыытын ырытыһар сыаллаах төгүрүк остуол буолан ааста. Тэрийээччиннэн буоллулар Саха Өрөспүүбүлүкэтин култууратын уонна духуобунаһын министиэристибэтэ уонна кини тэрилтэтэ Өрөспүүбүлүкэтээҕи норуот айымньытын дьиэтэ. Иилээн-саҕалаан ыытта Саха Өрөспүүбүлүкэтин култууратын уонна духуобунай сайдыытын миниистирин солбуйаачы Макаров Николай Афанасьевич. Уопсайа 94 кыттааччы өрөспүүбүлүкэбит араас муннуктарыттан кэлэн атах тэпсэн олорон, дуоһуйа сэһэргэһэн, санааларын үллэстэн бардылар. Саха омугу түмэр төрүт үҥкүүтүн оһуохайбытын өссө хайдах сайыннарабыт, симэлийэн эрэр түөлбэ оһуохайын хайдах үйэтитэбит диэн кыһалҕа сомоҕолоһуу баарын көрдөрдө.

Оһуохай практиката теорияны кытта дьүөрэлэһэ сылдьар буолан төгүрүк остуолга теоретиктар уонна практиктар бэйэлэрин хайысхаларынан санааларын иһиттибит. Практика өттүнэн саха омук кэскилин түстэһэр “Оһуохай” обществоттан Дархан, үтүөлээх этээччилэр (Черноградскай С. И., Саввинов А. В., Алексеев А. Е., Борисов И. И., Хорунов В. В., Бястинова М. М., Меркурьева С. Д, Хобусарова М. В) оһуохай инники сайдыытыгар санааларын үллэһиннилэр. Үөрэҕирии өттүнэн М.К. Аммосов аатынан Арассыыйа Бэдэрээссийэтин Хотугулуу-Илиҥҥи үнүбэрсиэтиттэн (Ефимова Л. С., Илларионов В. В.), гуманитарнай чинчийии уонна хотугу аҕыйах ахсааннаах норуоттар кыһалҕаларын үнүстүүтүттэн (Мухоплева С. Д., Васильев В. Е.) билим дуоктардара, хандьыдааттар теория өттүнэнэн билиилэрин, көрүүлэрин кэпсээтилэр. Ону таһынан, хас биирдии этиэн баҕалаах тус санаатын истэн түмүк санааҕа кэллибит. Оһуохай инники сайдыытыгар Министиэристибэ тэрийэр өрөспүүбүлүкэ күрэхтэрин элбэтии, билимҥэ чуолаан оһуохайы чинчийиини сайыннарыы, научно-практическай кэмпириэнсийэлэри тэрийэн эдэр ыччаты көҕүлээһин, түөлбэ оһуохайын үйэтитии боппуоруостарын көрүөххэ диэн этиилэри иһиттибит. Ону таһынан, Саха Өрөспүүбүлүкэтин култууратын уонна духуобунаһын министиристибэтэ салайыылаах эксперт сэбиэтин тэрийэн норуот айымньытын дьиэтинэн иһинэн Өрөспүүбүлкэтээҕи оһуохай Ассоциациятын тэрийии боппуруоһа турда. Кэлбит дьон министиэристибэ чуолаан оһуохайга болҕомто ууран сайыннарыы үлэтин саҕалаан эрэриттэн үөрэн туран Өрөспүүбүлүкэтээҕи Оһуохай Ассоциациятын тэрийиитигэр сөбүлэҥнэрин биэрдилэр. Министиэристибэ өттүттэн бу маннык хамсааһын өрөспүүбүлүкэ таһымыгар бастакы хардыыта буолар.  

Үгүс үйэлэри уҥуордаан кэлбит төрүт үҥкүүбүт оһуохайбыт сайдыыта хас биирдиибититтэн тутулактах, бары биир санааннан салайтаран кэнэҕэски ыччакка үтүө үгэһи хаалларыахха диэн төгүрүк остуол үтүө санааннан түмүктэннэ.   

Пресс-центр Минкультуры РС(Я)

  

  

  

  

   

Количество показов: 26

Возврат к списку