Ведутся работы по реконструкции проекта

Уһун Күөлгэ култуура киинин саҥа дьиэтэ аһылынна

01.09.2018
Количество показов: 13
Саха Өрөспүүбүлүкэтин Ил Түмэнин Бэрэссэдээтэлэ Александр Жирков атырдьах ыйын 31 күнүгэр Уус Алдан улууһун Уһун Күөл бөһүөлэгэр «Аргыс» култуура киинин дьиэтин үөрүүлээх аһыллыытыгар кытынна.
 
Саҥа объекка киирии сиэрин-туомун педагогическай үлэ, сцена бэтэрээнэ Иван Бурцев алгыһынан арыйда. Тутууну ыыппыт «СПМ-Альянс» ХЭТ генеральнай дириэктэрэ Павел Сергеев «Аргыс» култуура киинин дириэктэрэ Иннокентий Борисовка символическай күлүүһү туттарда.
 
Аалай лиэнтэни Ил Түмэн Бэрэссэдээтэлэ Александр Жирков, СӨ Үүнэр көлүөнэтин фондатын генеральнай дириэктэрэ Сергей Местников, СӨ норуот айымньытын уонна социальнай-култуурунай технологиятын киинин дириэктэрэ Сергей Семенов, I Өспөх нэһилиэгин баһылыга Михаил Домотов, «Аргыс» култуура киинин дириэктэрэ Иннокентий Борисов кырыйдылар.
 
Александр Жирков мустубут дьону үөрүүлээх түгэнинэн өрөспүүбүлүкэ салалтатын уонна Ил Түмэн аатыттан эҕэрдэлээтэ. Спикер култуура дьиэтэ тутуллан үлэҕэ киириитигэр олохтоохтор улахан өҥөлөөхтөрүн бэлиэтээн эттэ. «Эһиги бэйэҕит нэһилиэктээх буоларгытын, оскуолаҕыт дьиэлэнэрин, орто оскуола статустанарын туруулаһан ылбыккыт. Ол да курдук, тупсаҕай тутуулаах култуура дьиэлэнэргитин ситистигит. Онон бэйэҕит сиргитин-уоккутун, төрөөбүт түөлбэҕитин таптаан манна олохсуйан олорор дьоҥҥо махтаныахпын баҕарабын. Бүгүн биһиги бу I Өспөх нэһилиэк буолуутугар Егор Иванович Кириллов, Петр Михайлович Стрекаловскай курдук салайааччылар бэйэлэрин кыһамньыларын уурбуттарын ахтан саныаҕыҥ. Алгысчыт бастыҥ тылыгар эппитин курдук сырдык, сылаас, аныгылыы тупсаҕай дьиэ элбэх ыалдьыт сылдьар, дьон-сэргэ сөбүлээн мустар, нэһилиэк сайдарыгар туһалаах киин буоллун», -- диэн баҕа санаатын эттэ.
 
Спикер Саха сирэ Россия састаабыгар киирбитэ 385 сылынан үбүлүөйдээх бэлиэни педагогическай үлэ бэтэрээнэ, I Өспөх нэһилиэгин бочуоттаах олохтооҕо Иван Бурцевка, үлэ бэтэрээнэ, I Өспөх нэһилиэгин бочуоттаах олохтооҕо Ирина Кирилловаҕа, өрөспүүбүлүкэ социальнай-экономическай сайдыытыгар кылаатын иһин Ил Түмэн Бэрэссэдээтэлин Махтал суругун «Кытыл» уопсастыбаннай түмсүү салайааччыта Антонина Чемезоваҕа, Уһун Күөл орто оскуолатын историяҕа учуутала Маргарита Мартыноваҕа, Ил Түмэн Бочуотунай грамотатын култуура бэтэрээнэ, Уһун Күөл култууратын дьиэтин 1981-2017 сс. уус уран салайааччыта Ольга Домотоваҕа туттарда.
 
Бу күн ыалдьыттарга саҥа дьиэ устун экскурсия оҥордулар, олохтоох маастардар үлэлэрин билиһиннэрдилэр, нэһилиэк култууратын сайдыытын кэпсиир быыстапканы көрдөрдүлэр. Култуура киинин саҥа сценатыгар нэһилиэк талааннара бырааһынньыктааҕы концерт көрдөрдүлэр.
 
Ил Түмэн пресс-сулууспата
Количество показов: 13

Возврат к списку