Василий Местников: Олохтоох бэйэни салайыныы органнара – норуокка саамай чугас былаас

18.04.2019
Количество показов: 18
Убаастабыллаах улуус, нэһилиэк баһылыктара, депутаттара, муниципальнай сулууспа үлэһиттэрэ, олохтоох бэйэни салайыныы бэтэрээннэрэ!
 
Эһигини Российскай Федерацияҕа олохтоох бэйэни салайыныы күнүнэн Саха Өрөспүүбүлүкэтин Судаарыстыбаннай Мунньаҕын (Ил Түмэнин) олохтоох бэйэни салайыныы боппуруостарыгар сис кэмитиэтин уонна тус бэйэм ааппыттан итиитик-истиҥник эҕэрдэлиибин!
 

 

Эһигини Российскай Федерацияҕа олохтоох бэйэни салайыныы күнүнэн Саха Өрөспүүбүлүкэтин Судаарыстыбаннай Мунньаҕын (Ил Түмэнин) олохтоох бэйэни салайыныы боппуруостарыгар сис кэмитиэтин уонна тус бэйэм ааппыттан итиитик-истиҥник эҕэрдэлиибин!

 

Олохтоох бэйэни салайыныы органнара – судаарыстыба норуокка саамай чугас, быһаччы дьайыылаах алын сүһүөҕэ буолаллар. Төһө да олохтоох бэйэни салайыныы судаарыстыба органнарын кытта биир тиһиккэ киирбэтин, тутулуга суоҕун иһин, дьон-норуот былаас, саламта үлэтин аан-бастаан нэһилиэк, улуус баһылыктарын, депутаттарын үлэлэринэн сыаналыыр,  араас кыһалҕалаах боппуруостарга аан бастаан олохтоох дьаһалта боруогун атыллыыр. Онон, олохтоох бэйэни салайыныы үлэтиттэн дойдубут күннээҕи олоҕо-дьаһаҕа, инники сайдыыта, дьон-норуот былааска сыһыана быһаччы тутулуктаах.

 

Биһиги олохтоох бэйэни салайыныыга киирбиппит быйыл баара-суоҕа 16-с сыла. Бу кылгас кэм  иһигэр олохтоох бэйэни салайыныыны сайыннарыыга, атаҕар туруорууга биһиги өрөспүүбүлүкэбитигэр бары таһымҥа үгүс үлэ барда, ол иһигэр тирэх буолар сүрүн сокуоннар, уураахтар, дьаһаллар ылынылыннылар, өрөспүүбүлүкэ саламтатын өттүттэн тыа сирин, куораттары, нэһилиэктэри сайыннарыыга элбэх бырайыактар, үбүлээһиннэр үлэлээн кэллилэр, олохтоох бэйэни салайыныы көдьүүстээҕэр дьон-норуот итэҕэлэ үөскээтэ. Биһиги сүрүн сорукпут бу баар ситиһиини салгыы сайыннаран, олохтоох бэйэни салайыныы толору күүһүн, кыаҕын туһанан үлэлиирин хааччыйыы, дьиҥ чахчы норуот былааһа буоларын биллэрии.

 

Күндү коллегаларым! Эһигини бу кэрэ-бэлиэ күнүнэн ис сүрэхпиттэн эҕэрдэлээн туран, кытаанах доруобуйаны, үгүс сыралаах үлэҕитигэр үрдүк ситиһиилэри, үтүө түмүктэри баҕарабын! Cанаабыккыт сатанан, толкуйдаабыккыт туолан олоххо киирэн истин, дьоҥҥут-сэргэҕит махтала күүскүтүгэр күүс биэрдин, кынат буоллун!

 

Саха Өрөспүүбүлүкэтин Судаарыстыбаннай Мунньаҕын (Ил Түмэнин) олохтоох бэйэни салайыныы боппуруостарыгар сис кэмитиэтин бэрэссэдээтэлэ В.А. Местников

Количество показов: 18


Возврат к списку