Абыйга - муус күрэх

07.12.2018
Количество показов: 40

Сэтинньи 1 күнүгэр Абый нэһилиэгэр олохтоох дьаһалта көҕүлээһининэн уонна тэрийиитинэн, «Муус күрэх» буолан ааста. Олохтоохтору түмэр, кырдьаҕаска-кыаммакка муус ылыытыгар көмөлөһүү курдук, үтүө сыаллаах тэрээһин иккис сылын ыытылынна. Манна нэһилиэк тэрилтэлэрэ, аймахтар, табаарыстыылар хамаанда туруораннар, көхтөөх үлэ бырааһынньыга, күрэхтэһии, көрдөөх оонньуу бэрээдэгинэн барбытын бэлиэтиир тоҕоостоох. Муус ылыытыттан ураты, хамаандалар 3 мууһу анньыыга, керлицца, «Буран» курун тардыыга, «Дружба» бензопила  ыһыытыгар-таҥыытыгар, анньыынан муус хостооһунугар күрэхтэстилэр. Сынньалаҥ кэмигэр ырыа-тойук, атыы-эргиэн дьаарбаҥката тэрилиннэ.

         Күрэхтэһии түмүгүнэн, «Мы дарим людям тепло» ОДьКХ филиалын хамаандата иккис сылын бастаата. Иккис миэстэҕэ «Боотурдар» диэн ааттаах оҕо уһуйаанын хамаандата, үһүс бириистээх миэстэҕэ «Белый медведь» диэн эдэр ыччат хамаандата буоллулар. Былырыыҥҥы абсолютнай чемпион, Эдуард Стручков, бу да сырыыга сүрүн бириис,  «Штиль» бензопила хаһаайынынан буолла. Итини сэргэ, муус скульптуралар күрэхтэригэр «Лучший скульптор» номинация хаһаайын аатын Игорь Никулин сүктэ. Бэйэтин хамаандатын туһугар таһаарыылаахтык киирсэн, соҕотох кэрэ аҥар, Анна Эверстова, сыаннай бирииһинэн наҕараадаланна.

         Күрэхтэһии биир тыынынан, көхтөөхтүк, үрдүк тэрээһиннээхтик ааһан, дьону-сэргэни астыннарда. Нэһилиэк урбаанньыттара, тэрилтэлэрэ, биирдиилээн дьоно бу тэрээһини өйөөннөр, сыаналаах бириистэри туруораннар, күүс-көмө буолбуттарыгар, олохтоох салалта махтанар.

         Күргүөмүнэн ылыллыбыт мууһу, сотору кэминэн, эдэр ыччат кыаммат, кырдьаҕас дьоҥҥо таһааран биэрэн, үтүө дьыала тэрээһинэ салҕаныа турдаҕа...

 

 

Количество показов: 40