Абыйга саҥа оскуола дьиэтэ дьэндэйдэ

Абыйга саҥа оскуола дьиэтэ дьэндэйдэ | Администрация МР Абыйский район
11.04.2019
Количество показов: 49

Олунньу 26 күнүгэр, Абый нэһилиэгэр, саҥа оскуола дьиэтэ үөрүүлээх быһыыга-майгыга арылынна.

            Тыа сиригэр, буолан баран уһук хоту, бу бастакы таас дьиэлэртэн биирдэстэрэ буолар. 2 этээстээх, 90 миэстэлээх, 2405 кв. м. иэннээх толору хааччыллыылаах дьиэни «Тутуу дирекцията» хааччахтаммыт эппиэтинэстээх тэрилтэ 2 сылы кыайбат кэмҥэ тутта. Генеральнай директор Сергей Никитин оскуола символическай  күлүүһүн директор Раиса Владимировна Бережноваҕа үөрүүлээх быһыыга-майгыга туттарда.

            Үөрүүлээх тэрээһиҥҥэ Арктика Минитстиэристибэтин Миниистирэ Александр Саввинов салайааччылаах Республика салалтатын делегацията кыттыыны ылла. Дьоро күҥҥэ кэлбит ыалдьыттар элбэх эҕэрдэ тылы эттилэр, баҕа санааны тиэртилэр.

            СР Арктика дьыалаларыгар миниистирэ Александр Саввинов, «Фонд будущих поколений» тэрилтэ генеральнай дириэктэрэ Сергей Местников, СР үөрэҕин уонна наукатын миниистирин 1 солбуйааччыта Ирина Любимова, «Хотугу сулус» уордьан кавалера, норуот хаһаайыстыбатын үтүөлээх үлэһитэ Будимир Слепцов, СР общественнай палататын чилиэнэ Иван Горохов, СР Доруобуйа харыстабылын туйгуна Антонина Ефимова о.д.а. эҕэрдэ тылы эттилэр.

            Саҥа дьиэ сырдык тыыннаах, сылаас салгыннаах буоллун диэн, Алгыс тылы кырдьаҕас ветеран-учуутал Ариан Тимофеевич Томскай эттэ.

            Уһук хоту сиргэ аныгы технологиянан тутуллубут билии храма туспа спортсаалалаах, элбэх кылаас-комплектардаах, аактабай саалалаах, лингофоннай кылаастаах, 11000 кинигэ ахсааннаах библиотекалаах, киэҥ сырдык холлардаах,  анал кухня, душевой, туалет, барыта силигин ситэн, орун оннуларын булбуттар.

Кэлэр кэскил кэрэһиттэрэ, кэнчээри ыччаттар сахалыы, нууччалыы, омуктуу харда тыл этэн, үөрэхтэрин, кылаастарын туһунан чобуотук  сырдатан, ыалдьыттары үөртүлэр. Кинилэргэ, педколлективка үөрэх киэҥ аартыгар үрдүк чыпчааллары дабайыҥ, тобуллаҕас өйдөөх-санаалаах, киэҥ билиилээх-көрүүлээх буолуҥ диэн, алгыс тыллары анаатылар.


Количество показов: 49


Возврат к списку
Обратите внимание

Другие новости текущего источника информации
Загрузка