Кэбэргэнэҕэ - БУРАН АЙАН күрэх

Кэбэргэнэҕэ - БУРАН АЙАН күрэх | Администрация МР Абыйский район
30.04.2019
Количество показов: 57

Соторутааҕыта Абый улууһун Кэбэргэнэ нэһилиэгэр «БУРАН АЙАН» диэн күрэх улууска аан маҥнайгытын ыытылынна.

            Сааскы ылааҥы күн, Абый улууһун Кэбэргэнэ сэлиэнньэтигэр, «Буран айан» күрэххэ үгүс киһи тоҕуоруһа муһунна. Кыттааччылар, ох курдук оҥостон, үчүгэй бэлэмнээх, арахсыспат аргыстарыгар, сыыдам сырыылаах эрэллээх көлөлөрүгэр, бураннарыгар эрэнэн туран, кыайыы иһин кииристилэр. Күрэхтэһиини кэлии киһитэ, күтүөт, киириилээх-тахсыылаах Алдаан Свешников көҕүлээн, элбэҕи туруорсан, спонсордары булан, тэрийбит. Кини нэһилиэк Аҕа баһылыгар Иван Атласовка бэйэтин баҕа санаатын эппитигэр, тутатына сөбүлэһээт, 1.5 ый иһигэр кэпсэтэн, туруорсан, күрэхтэрин үрдүк таһымҥа ыыттылар. Дьокуускай куоракка тиийэн «Русская механика» маҕаһыыны кытта дуогабардаһан, 60 тыһ сууммалаах сертификаттары, түһүмэхтэринэн анаатылар. Итини сэргэ, Үрүҥ Хайатааҕы нефтебаза (салайааччы Г.А.Ефимов) эмиэ бириис быһыытынан, 80 л тааралаах бензин туруордулар. Оттон сүрүн бириис – СКС уонна МР-15 саалары, күрэх тэрийээччитэ Алдаан Свешников бэйэтэ уонна улуус дьаһалтатын Баһылыга Станислав Цюхцинскай спонсордаатылар.

            Хамаандалар ааттара уонна састааптара: «Дьоҕур» - Борис Попов, Семен Пермяков, «Модун» - Сергей Жирков, Иннокентий Слепцов, «Уолбут» - Михаил Ушаков, Роберт Жирков,  «Дохсун» -  Константин Лебедев, Сергей Слепцов, «Бырааттыылар» - Дмитрий Слепцов, Гаврил Никулин, «Ыстаада» - Николай Рязанскай, Олег Черемкин, «Барс» - Алексей Слепцов, Михаил Садовников, «Лидер» - Сидор Сидоров, Станислав Жирков, «Эвэнчэ» - Филипп Скрябин, Иван Никулин, «Дороги Арктики» - Егор Шкулев, Александр Стручков, «Т-34» -  Алексей Бережнов, Иван Попов. Уолаттар бары да, айаҥҥа-сырыыга сылдьар, Буран көлөлөрүн биэс тарбах курдук билэр уоппуттаах дьон. Кинилэр быыстарыгар, Үрүҥ Хайаттан «Дороги Арктики», Уолбуттан «Уолбут» уонна, Кэбэргэнэ эдэр, күүстээх-сымса күтүөттэрин бэлиэтиир тоҕоостоох.

            Күрэх 5 этаптан турда: биатлон, буран өрөмүөнэ, мал хомунуу, эстафета уонна суперфинал. Биатлон күрэҕэр биир-биир буранынан сүүрдэн тиийэн, сыалы ыттылар. Манна күрэхтэһээччилэр түргэн-тарҕан туттуулара, кыраҕы харахтаахтара бириэмэҕэ быһаарылынна. Ол курдук, «Т-34» хамаанда 1 мүн 53 сөк., «Дохсуннар» 2 мүн 12 сөк. уонна «Бырааттыылар» 2 мүн. 42 сөк. кэлэннэр, үчүгэй көрдөрүүнү ситистилэр. «Буран өрөмүөнэ» иккис түһүмэххэ күрэхтэһээччилэр эмиэ анал учаастакка сүүрдэн тиийэн бураннарын «өрөмүөннээтилэр», ол аата катоктарын устан баран, төттөрү олордоллор уонна «гаражтарыгар» киирэллэр. Манна ордук үчүгэй көрдөрүүнү «Ыстаада» хамаанда 2 мүн. 19 сөк., «Дохсун» 2 мүн 24 сөк., «Модун» 2 мүн. 31 сөк. көрдөрдүлэр. Мал хомунуу түһүмэх эмиэ бэрт сэргэхтик ааста. Ол курдук, күрэхтэһээччилэр хамаанда бэриллээтин кытта сүүрэн тиийэн бураннарын собуоттаат сүүрдэллэр, ол кэннэ биирдэрэ түһэн буран сыарҕатын соһон аҕалар, иилэллэр, онтон анал баҕанаҕа турар көлүөһэни ылан сыарҕаҕа уураллар, миэстэлэрин атастаһаллар, иккис көлүөһэни уураллар уонна гаражка киирэллэр. Бу этапка туһааннааҕынан «Модун», «Барс», «Бырааттыылар» кыайыылаах таҕыстылар. Эстафетаҕа бастакы миэстэни «Дороги Арктики», иккиһи «Т-34», үһүс бириистээх миэстэни «Модуннар» ыллылар. Бүтэһик этапка, инники түһүмэхтэргэ биэс бастакы үчүгэй көрдөрүүлээх хамаанда 1,5 км сиргэ суперфиналга, буранынан сүүрдүүгэ кииристилэр. Эрийсиилээх киирсиигэ, сыыдам сырыылаах, айаны айаннаабыт, киэҥ ыырынан тэлэһийэ сылдьар «Ыстаада» хамаанда (Николай Рязанскай, Олег Черемкин) биэтэккэ бастакынан кэлэн, кыайыылаах үрдүк аатын ылла. Уонна кинилэр, күрэх сүрүн бирииһин хаһаайыннарынан: СКС уонна ботуруон саа сертификаттарынан наҕараадаланан, үөрдүлэр-көттүлэр.

            Уопсай күрэх кэнниттэн, дьон-сэргэ азартанан, коммерческай сүүрдүүгэ кииристилэр. Тыҥааһыннаах киирсиигэ Үрүҥ Хайаттан сылдьар Александр Стручков кыайыы өрөгөйүн биллэ.

            Ити курдук, түөлбэлээн олорор Майыар национальнай нэһилиэгин дьоно-сэргэтэ, ыалдьыттара, сүргэлэрэ көтөҕүллэн, бэрт интэриэһинэй, үрдүк тэрээһиннээх «Буран айан» күрэҕи ыыттылар. Маныаха тэрээһин боппуруостара барыта ымпыгар-чымпыгар диэри толкуйдаммыттарын бэлиэтиир наадалаах. Ол курдук, анал бэлиэ таҥастаах-саптаах судьуйалар, рациянан сибээс, итии чэйинэн хааччыллыы, о.д.а. тэрээһин боппуруостара эрдэттэн толкуйданан быһаарыллыбыттар. Инникитин, дьону түмэр, сомоҕолуур, чөл олоҕу көҕүлүүр маннык тэрээһини сыллата ыытарга былаанныыллар. Дьон-киһи тоҕуоруһа мустубут норуот бырааһынньыга уопсай Һээдьэнэн түмүктэннэ.

 

 


Количество показов: 57


Возврат к списку
Обратите внимание

Другие новости текущего источника информации