АЛЛАЙЫАХА ХОҺУУН КЫРДЬАҔАҺА 90 СААҺЫН ТУОЛЛА

06.02.2019
Количество показов: 25

 

 

Аллайыаха улууһугар икки ытык кырдьаҕас ыччакка үтүө сүбэһит буолан олорор. Бу күннэргэ Чокурдаахха тыыл уонна үлэ бэтэрээнэ, олохтоох хоһоонньут Лебедев Иван Алексеевич 90 сааһын бэлиэтээтэ.

Чокурдаах кырдьаҕаһа Уйбаан олунньу 3 күнүгэр Уус Дьааҥы (Усуйаана) улууһугар күн сирин көрбүт. Эдэр сааһыттан таба ыстаадатыгар бостууктаан, биригэдьиирдээн Хоту дойду дьиҥнээх хоһуун уола!

Күнү көрбүт күндү сирим
Хоромойум үрэҕэ,
Уус Дьааҥым, оҕо сааһым
Умнуллубат биэрэгэ.

И.А.Лебедев 1966 с. уон сыл устата «Аллайыаха» совхоз Бөрөлөөхтөөҕү отделениетыгар булчутунан охсуулахтык үлэлээбит. Ол ситиһиилэрин биир бэлиэ өйдөбүнньүгүнэн РСФСР Үрдүкү Сибиэтин Президиумун Бочуотунай грамотата буолар.

Табаккам барахсан,
Таптыыбын эйигин,
Адьырҕа бииһиттэн
Арыаллыыр күннэрбин.

Айылҕаттан талааннаах уол оҕо эрдэҕиттэн сурукка-бичиккэ тардыһара. Төһө да ыарахан сыллар охсууларыттан үөрэммэккэ хаалбытын иһин, ырыа-хоһоон аргыстаах олорон кэллэ. Хоноһо Уйбаан диэн ааты И.А.Лебедевка саха биллиилээх суруйааччыта Степан Дадаскинов биэрбит. «Мин бу бэрт кыра үөрэхтээх киһи бэйэтин өйүнэн-санаатынан маннык дириҥ ис хоһоонноох, уус-мааны тыллаах, тупсаҕай кэрэ айымньылары суруйарын сөҕөн-махтайан «Хоһоонньут ХоноҺо» диэн ааттаатым», — диэбит.

Ахтабын олуһун
Туундарам олоҕун,
Ардаҕын, буурҕатын
Амсайбыт күннэрбин.

Эдэр сааһыгар Уйбаан уус-уран самодеятельность актыыбынай кыттыылааҕа, оройуон хаһыатыгар общественнай корреспонденнабыт. 2013 с. «Көмүөл» кинигэ кыһатыгар Иван Лебедев-Хоноһо «Туундарам ахтылҕана» диэн хоһооннорун хомуурунньуга тахсыбыта. Биир дойдулаахтара тыыл бэтэрээнэ, бэртээхэй хоһооннор ааптардарынан киэн тутталлар. Аспыт сылларга улуус библиотектыгар «Үлэ-хоһоон аргыстаах үтүө-мааны киһибит» диэн биэчэри, көрсүһүүлэри тэрийбитэ.

Бу ый 3 күнүгэр И.А.Лебедевка улуус баһылыгын маҥнайгы солбуйааччыта А.А.Суздалова, Бөрөлөөх нэһилиэгин баһылыгын солбуйааччыта Н.Н.Терентьев, тыыл бэтэрээнэ Е.Д.Ефимов, салайааччылар Р.Н.Зырянова, М.И.Иванова, аймахтара тиийэн ытык кырдьаҕастарыгар сонуннары кэпсээтилэр, махтал суруктары туттардылар.

Иван Алексеевич бу кырдьар сааһыгар саҥа дьиэҕэ сылаас кыбартыыраҕа олороруттан үөрэбин диэтэ уонна маннык тыллары эттэ: «Эдэрдэр ханнык да түбэлтэттэн хараастымаҥ, куруутун инники кэккэҕэ сылдьыҥ. Күүскүтүн харыстаабакка улуускут туһугар үлэлээҥ».

Ыҥырар саҕахха ыттыаҕыҥ,
Ырааска, сырдыкка тахсыаҕыҥ,
Омукпут удьуорун тутуһуох,
Ол оннук олоҕу тэнитиэх.
Махтал Эйиэхэ, күндү киһибит!

Ааптар: Клавдия ПОРТНЯГИНА.

Количество показов: 25