АММАҔА ИЛИН ЭҤЭРДЭР БАҺЫЛЫКТАРА УОННА ДЬОКУТААТТАРА ТҮМҮСТҮЛЭР.

АММАҔА ИЛИН ЭҤЭРДЭР БАҺЫЛЫКТАРА УОННА ДЬОКУТААТТАРА ТҮМҮСТҮЛЭР. | Администрация МР Амгинский район
10.08.2019
Количество показов: 17

   Амма туоната эмиэ ыалдьыттары көрсөр. Семинар кыттыылаахтара нэһилиэнньэни долгутар боппуруостары дьүүллэстилэр. 

  Амматааҕы Ф. Потапов аатынан култуура киинигэр илин эҥэр улуустар муниципальнай тэрээһиннэрин уонна бэрэстэбиитэллээх уорганнарын үгэскэ кубулуйбут сүбэ мунньахтара ыытылынна. Семинары муниципальнай тэриллиилэр Сэбиэттэрин бэрэссэдээтэлэ Михаил Соров салайан ыытта. Эҕэрдэ тылларын Ил Түмэн Судаарыстыбаннай Мунньах бэрэссэдээтэлэ Петр Гоголев уонна улуус баһылыга Николай Архипов тириэртилэр.   Ыытыллыбыт тэрээһиҥҥэ 131 баһылык уонна дьокутаат кыттыыны ылла.

  Семинар саҕаланатыыгар олохтоох салайыныы үлэтигэр бастыҥ үлэни көрдөрөр дьону бэлиэтэннилэр. Ил Түмэн Судаарыстыбаннай Мунньах иһинэн баар бэрэстэбиитэллээх уорган Махтал суругунан Сатаҕай нэһилиэгин баһылыга Семен Давыдов, муниципальнай тэриллиилэр Сэбиэттэрин Бочуотунай грамотатынан ФКУ начальнига Наталья Ефремова уонна Махтал суругунан Чапчылҕан нэһилиэгин дьаһалтатын исписэлииһэ Саина Шестакова наҕараадаланнылар.

     Сэбиэт бэрэссэдээтэлэ Михаил Соров билигин олохтоох бэйэни салайыныы уорганнарын иннигэр турар соруктар, инникитин ханнык туох боппуруостарга болҕомто күүһүрүөн наадатын туһунан иһитиннэрии оҥордо. Кини баһылыктарга туһаайан Сэбиэт бырабылыанньатын мунньаҕар киириэхтээх бэбиэскэҕэ бэйэлэрин боппуруостарын киллэриигэ көхтөөхтүк кытталларыгар ыҥырда.

    “Кулун тутарга буолбут съезпитигэр миигин Сэбиэт бэрэссэдээтэлинэн талбыттара. Сэбиэт иһинэн 50 киһилээх бырабылыанньалаахпыт. Кыбаарталга биирдэ мустан сүбэлэһэбит. Дьэ онно биһиги семинарга тугу  көрүөхпүтүн сөбүн дьүүллэспиппит. Ол быһыытынан билиҥҥи кэмҥэ ханнык боппуруостар ордук нэһилиэнньэни долгуталларын көрөн киллэрдибит. Ол курдук холобура тыа хаһаайыстыбатыгар баар бырагырааммалар, кытаанах оттук реформата, ойуур баһаардара курдук боппуруостарга иһитиннэриилэри оҥордубут. Түмүккэ баһылыктар тустаах дьоннорго ыйытыыларын биэриэхтэрэ”, — диэн этэр Михаил Михайлович. Дьэ чахчы да семинар бэбиэскэтигэр билигин барыбытын долгутар да, интэриэһирргэтэр да боппуруостар киирэн, кыттыылаахтар бары болҕойон олорон иһиттилэр.

    Ол курдук тыа хаһаайыстыбатыгар көрүллэр судаарыстыбаннай бырагырааммалар тустарынан СӨ тыатын хаһаайыстыбатын миниистирэ Александр Атласов, олохтоох дьаһалталар кытаанах оттук реформатын ыытар региональнай операторы кытта хайдах үлэлэһиэхтээхтэрин, туох эбээһинэстээхтэрин туһунан СӨ ОДьКХ министиэристибэтин иһинэн бу боппуруоска үлэлэһэр Департамент салайааччыта Валентин Чан уонна илин эҥэр улуустары хабар региональнай оператор, “Экологические системы Якутии” ХЭТ генеральнай директора Петр Алексеев, илин эҥэр улуустар экологическай туруктарын туһунан СӨ экологияҕа, айылҕаны туһаныы уонна ойуур хаһаайыстыбатын министиэристибэтиттэн Департаменнар салайааччылара Степан Куличкин уонна Иннокентий Кычкин, хаарбах дьиэлэртэн көһөрүү бырагыраамматыгар тахсар кыһалҕалар тустарынан СӨ тутууга миниистирин солбуйааччы Евгений Афанасьев, олохтоох бэйэни салайыныыны тэрийии  уопсай бириинсиптэригэр киирэр уларыйыылар уратыларын туһунан СӨ Ил Дарханын уонна Бырабыытылыстыбатын Дьаһалтатын олохтоох бэйэни салайыныы Департаменын салайааччытын э.т. Владимир Аржаков кэпсээтилэр, иһитиннэриилэри оҥордулар. Маны сэргэ аныгы сэлиэнньэ моделын, инникитин эдэр ыччат тыа сиригэр олорорун хааччыйыыга хайдах көстүүлээх, олохтоох-дьаһахтаах нэһилиэк баар буолуохтааҕын туһунан Чурапчы улууһун Дириҥ нэһилиэгин баһылыга Борис Архипов “Амма кырдалын ыччата” хамсааһын оҥорбут бырайыагын бэйэтин нэһилиэгэр холорбурдаан оҥорбуттарын билиһиннэрдэ. Кинини өрөспүүбүлүкэ бааһынайдарын Ассоциациятын бэрэссэдээтэлэ Александр Артемьев ситэрэн биэрдэ уонна бырайыагы өйүүргэ ыҥырда.

   “Бу курдук бары биир кыһалҕалаах дьон түмсэн долгутар боппуруостарбытын дьүүллэһэрбит, истэрбит үлэҕэ-хамнаска туһалаах буоллаҕа. Ол гынан баран инникитин уларытыылары киллэриэххэ наада быһыылаах. Сорох дакылааттарга улахан сыһыана суох информациялар бааллар. Холобура ити ойуур баһаардарыгар. Манна чопчу турар кыһалҕаларынан, сокуон өртүнэн туох хааччахтар баалларын кэпсиэххэ баар этэ. Биири сэргээтим уонна толору өйүүбүн. Ол курдук Михаил Михайлович Соров ититиигэ тахсыбыт кэмчилээһини үп министиэристибэтэ ыытыллыбыт дотацияттан көҕүрэтэн ыытара баһылыктарга бу боппуруоска үлэлэһэллэригэр көмө буолбат диэн эттэ. Чахчы да кэмчилэммит харчыны биһиги нэһилиэнньэ олоҕун чэпчэтиигэ туттубат, ону туһаммат буоллахпытына, тоҕо итинник үлэлэри ыыта сатыыбытый диэн боппуруос тахсан кэлэр. Хаарбах дьиэлэртэн көһөрүү туһунан эмиэ сүрдээх үчүгэй сүбэлэри биэрдилэр. Онон быһатын семинар ыытыллара олус көмөлөөх уонна наадалаах”, — диэн Амма улууһун Болугур нэһилиэгин баһылыгынан талыллан үһүс сылын үлэлиир Степан Кузьмин санаатын үллэһиннэ. Мунньах түмүгэр кэлэр семинары уопсай куоластааһынынан Уус Алдан улууһугар ыытарга сүбэлэстилэр. Эбиэттэн киэһэ баһылыктар уонна дьокутааттар спорт үс көрүҥэр күрэхтэстилэр.

Семинар туһунан сиһилии «Амма олоҕор» ааҕан билсээрин.

Ааптар: Наталья Бубякина.

Хаартыска: Амма улууhун дьаhалтатын пресс-сулууспата.


Количество показов: 17


Возврат к списку
Обратите внимание

Другие новости текущего источника информации
Загрузка