АММАҔА УЛАХАН МУОСТА ТУТУЛЛАН ТҮМҮКТЭНЭН ЭРЭР

АММАҔА УЛАХАН МУОСТА ТУТУЛЛАН ТҮМҮКТЭНЭН ЭРЭР | Администрация МР Амгинский район
29.08.2019
Количество показов: 15

   Аммаҕа “Кириэстээх” үрэҕи туоруур муоста тутуута балаҕан ыйыгар түмүктэнэрэ былааннанар. Түөрт нэһилиэк дьоно-сэргэтэ аны сааскы халаан кэмигэр харгыһа суох айанныахтара.

   Амма улууһугар үрэхтэри туоруур муосталар былааннаахтык тутуллаллар. Ол курдук сааскы халаан кэмигэр улуус түөрт нэһилиэгэр ыарахаттары үөскэтэр “Кириэстээх” үрэҕи туоруур муоста тутуута сотору кэминэн түмүктэнэр.

   “Муоста тутуутун иллэрээ сылтан саҕалаабыппыт. Муостабыт уһуна 33, кэтитэ 7 миэтэрэ. Уйуга 50 тонна. Икки кытыытынан сатыы сылдьар дьон суоллаах. Тимир конструкциятын Новосибирскай куораттан аҕалбыппыт. Бэйэтэ бетон сыбаайаҕа турар. Уопсайынан үйэлээх тутуу буолар”, — диэн этэр муостаны тута сылдьар “Мосты Севера” ХЭТ маастара Николай Данилов. Кини кэпсээбитинэн өссө бу муостаны таһынан аллараа суол кытыытыгар дьон сынньанан ааһарыгар анаан беседка оҥоруохтара.

   “Муоста уопсай суумата 31 мөл. 660 тыһ. солк. Контракт бу сыл саҥатыгар, тохсунньу ыйга баттаммыта. Билэргит курдук Чакыр, Покровка, Амма Наахара, Болугур нэһилиэгин олохтоохторо саас, Кириэстээх үрэх хаатыттан тахсар кэмигэр, эргэ муостаны тоҕо көтөн, айанныылларыгар эрэйдэммиттэрэ хаһыс да сыллара. Онон бу билиҥҥитэ улууспутугар суох улахан муоста тутуллан бүттэҕинэ, хаайтарыы кыһалҕата суох буолуо. Инникитин өссө Чоллой, Тиргэлээх муосталарыгар үлэлэр барыахтара. Бырайыактара бааллар. Уопсайынан муосталар өрөмүөннэрэ өрөспүүбүлүкэ суолун фондатын , ону сэргэ муниципальнай бюджет нөҥүө кыттыгас үбүлээһин нөҥүө барар”, — диэн этэр улуус баһылыгын тутууга солбуйааччы Дмитрий Иванов.

   Тутааччылар эппиттэринэн кэтэһиилээх муоста балаҕан ыйын 10 күнүгэр үлэҕэ киириэхтээх.

Ааптар: “Амма олоҕо” хаһыат.


Количество показов: 15


Возврат к списку
Обратите внимание

Другие новости текущего источника информации