АММАЛАР АС – ҮӨЛ ДЬААРБАҤКАТЫГАР СИТИҺИИЛЭЭХТИК КЫТЫННЫЛАР

АММАЛАР АС – ҮӨЛ ДЬААРБАҤКАТЫГАР СИТИҺИИЛЭЭХТИК КЫТЫННЫЛАР | Администрация МР Амгинский район
30.09.2019
Количество показов: 12

Амма хаһаайыстыбалара өрөспүүбүлүкэтээҕи ас –үөл дьаарбаҥкатыгар бары көрүҥнэригэр чиэстээхтик кытыннылар. Бастыҥнар дипломнарынан бэлиэтэннилэр.

Амма улууһа Дьокуускай куоракка ыытыллыбыт үгэс буолбут өрөспүүбүлүкэтээҕи тыа хаһаайыстыбатын күһүҥҥү ас –үөл дьаарбаҥкатыгар ситиһиилээхтик кытынна.

Сэргэ Бэскэ хортуоппуйу үүннэриинэн дьарыктанар эдэр фермер Александр Фомин «Күһүҥҥү мозаика» көрүүгэ үһүс, оттон «Күһүн көмүһэ» күрэхтэһиигэ бастакы миэстэлэринэн бэлиэтэннэ. Оттон «Амма» ТХППК (бэрэссэдээтэл Айысен Черноградскай) сыыры оҥорууга үһүс, отонунан бородууксуйаҕа бастакы миэстэлэри ылла.

Бурдугу үүннэриинэн дьарыктанар «Амма» АУо (дириэктэр Роман Спасьев) Гран – при буолан кыайыы өрөгөйүн биллэ. Былырыын улууска ыытыллыбыт «Идэһэ» бырааһынньыгар аан бастаан кыайыылааҕынан тахсыбыт Амма нэһилиэгэ (баһылык Михаил Артемьев) өрөспүүбүлүкэтээҕи быыстапкаҕа кыттар быраабы ылбыта.

Өрүү тыа сирин нэһилиэктэрин эрэ хаһаайыстыбалара ситиһиилээх тахсар эбит буоллахтарына, улуус киинин олохтоохторо эмиэ бэйэлэрин сыралаах үлэлэрин – хамнастарын өрөспүүбүлүкэтээҕи дьаарбаҥкаҕа көрдөрөн чаҕылхайдык дакаастаатылар. Ол курдук»Ыллык» бааһынай хаһаайыстыба салайааччыта Мария Иванова ынах, коза үүтүттэн, ынах, куурусса, кролик этиттэн, балыктан, бурдук астарыттан, кэнсиэрбэлэрин, барыанньаларын барыта сүүстэн тахса көрүҥү, ону таһынан иитэр кыылларын, көтөрдөрүн илдьэн өрөспүүбүлүкэ олохтоохторугар көрдөрүүгэ туруоран «Бастыҥ бааһынай хаһаайыстыба» аатын ылан бастакы истиэпэннээх дипломунан наҕараадаланна.

Сылгыны уонна ынаҕы иитэр чааһынай хаһаайыстыбалаах Серафима уонна Семен Никандровтар дьиэ кэргэн убаһаттан, ынах этиттэн, балыктан, көтөртөн, кууруссаттан уонна бурдук, үүт аһылыктарын, кэнсиэрбэлэрин, утахтарын, барыанньаларын бэлэмнээн барыта сүүстэн тахса суол бородууксуйаларын быыстапкаҕа туруоран иккис истиэпэннээх дипломунан «Бастыҥ кэтэх хаһаайыстыба» аатын ыллылар. «Быйыл ыытыллыбыт өрөспүүбүлүкэтээҕи ас — үөл дьаарбаҥкатыгар бары көрүҥнэригэр ситиһиилээхтик кытынныбыт, көрдөрүүлэрбит да үчүгэйдэр.

Чааһынай уонна бааһынай хаһаайыстыбаларга улуус аатын Амма нэһилиэгэ чиэстээхтик көмүскээтэ. Ф.Ф.Потапов аатынан култуура киинин үлэһиттэрэ өрөспүүбүлүкэ олохтоохторугар бэртээхэй кэнсиэри көрдөрдүлэр. Саха сирин норуоттарын VII спортивнай оонньууларын бэлиэлэрэ дьон- сэргэ болҕомтотун ыллылар,» – диэн улууска тыа хаһаайыстыбатын салайар Ион Кононов үөрүүтүн үллэстэр.
Ааптар: Алтана Артемьева.


«Газета "Амма олоҕо"»


Количество показов: 12


Возврат к списку
Обратите внимание

Другие новости текущего источника информации
Загрузка