Булуҥтан Захар Черкашин хотугу многоборьеҕа Россия чемпионатыгар кыттар быраабы ылла

Булуҥтан Захар Черкашин хотугу многоборьеҕа Россия чемпионатыгар кыттар быраабы ылла | Администрация МР Булунский район
11.04.2019
Количество показов: 48

Дьокуускай куоракка эр дьоҥҥо уонна оскуола оҕолоругар өрөспүүбүлүкэтээҕи хотугу многоборье күрэҕэ ыытылынна. Тиксиитээҕи маҥнайгы нүөмэрдээх оскуола үөрэнээччитэ Захар Черкашин уонна Элбэх хайысхалаах лицей устудьуона Дмитрий Каурцев кытыннылар.

Оскуола оҕолорун ортолоругар ыытыллыбыт өрөспүүбүлүкэтээҕи чемпионакка Захар Черкашин Булуҥ улууһун аатын күүскэ ааттатта диэххэ наада. Куобахтаан ыстаныы көрүҥэр спортсмен 9 миэтирэ 48 см ойон, иккис үчүгэй көрдөрүүнү ситистэ. Сүүрүүгэ 16 кыттааччыттан биэтэккэ алтыһынан киирбит.

Булуҥнааҕы оҕо спортивнай оскуолатын иитиллээччитэ сүгэни 97 миэтирэ 32 см ыраах кыыратан, бу көрүҥҥэ үһүс бастыҥ көрдөрүүлээҕинэн ааттаммыт. Маамыкта быраҕыытыгар эдэр спортсмеммыт күнэ тахсыбатах. Чемпионаты түмүктүүр күҥҥэ, уол наартаны бэркэ ыстанан, хотугу многоборье күрэҕин олус чаҕылхайдык түмүктээбитин Култуурнай-спортивнай комплекс спорт салаатын салайааччыта Жан Самойлов бэлиэтиир. Чемпионат уопсай түмүгүнэн, Булуҥ улууһун былааҕын өрө анньан тахсыбыт Захар Черкашин өрөспүүбүлүкэ оҕолоругар муҥутуур кыайыылааҕынан ааттаммыт.

“Наарта ыстаныытын түһүмэҕэр, иккистээн төхтүрүйэн ыстаныытыгар Захар 300-тэн тахсата ойбута, онтон үсүһүгэр, кыайыыга дьулуурун, тулуурун көрдөрөн, 380-на ойбута. Онон кини атаҕар кыахтааҕын өссө төгүл дакаастаата. Бэлиэтээн эттэххэ, тэрийээччилэр ханнык да уол маннык көрдөрүүнү өссө ситиһэ илик диэн үөрүүлэрин биллэрбиттэрэ”, – диир Жан Александрович.

Булуҥ уола эр дьон ортотугар муус устар ыйга ыытыллыахтаах Россиятааҕы хотугу многоборье чемпионатыгар кыттарга быраабы толору ылла. Онон Захарга номнуо бэлэмнэнии дьарыктар саҕаламмыттар, кини Дьокуускайга хаалан, Россия таһымыгар ыытыллыахтаах күрэхтэһиигэ Саха сирин аатын көмүскүөҕэ.

Ааптар: Харысхан ПОПОВ

Хаартыскалары Жан Самойлов тиэрдиитэ

Источник: «Газета "Маяк Арктики"»  


Количество показов: 48


Возврат к списку
Обратите внимание

Другие новости текущего источника информации
Загрузка