Күһүүр табаларыгар анал бэлиэлэри туруоруу үлэтэ салҕанар

Күһүүр табаларыгар анал бэлиэлэри туруоруу үлэтэ салҕанар | Администрация МР Булунский район
11.04.2019
Количество показов: 38

“Булуҥнааҕы” МУТ ыстаадаларыгар сыл ахсын ыытыллар таба ахсаанын ааҕыыта саҕаланна. Исписэлиистэр туундара мааны кыылларыгар быһыы туруоруохтара итиэннэ анал бэлиэлэри кэтэрдиэхтэрэ.

Булуҥ улууһугар табаларга анал бэлиэлэри кэтэрдии былырыын күһүн Хара-Уулаах нэһилиэгин “Приморскайдааҕы” МУТ табаларыгар ыытыллыбыта. Москубаттан ISBC  хампаанньа  АПК  бөлөҕөр департаменын  салайааччыта Алексей  Антонов үлэлэспитэ. Дьиэ табатыгар бэлиэлэри туруорааһын сүүрээнэ Саха сиригэр саҥа  киирэн эрэр.

“Ыстаадаларга ахсаан кэмигэр 2500 кэриҥэ табаҕа чиип туруоруохпут. Былырыын Арктика кэмитиэтин нөҥүө субсидиянан бэлиэни иилэр тэрили ылбыппыт. Үлэ түмүктэннэҕинэ хас биирдии таба нүөмэрдээх буолуоҕа,” – диэн “Булуҥнааҕы” МУТ дириэктэрэ Руслан Лукин этэр. Руслан Семенович бу тэрилтэҕэ дириэктэринэн үлэлээбитэ номнуо иккис сыла буолла. Хаһаайыстыба уопсайа 96 үлэһиттээх.

Үлэһиттэр “Булуҥнааҕы” МУТ үс ыстаадатыгар, Сахандьа сиригэр таба хас саастааҕын, ханнык  хаһаайыстыбаҕа сыһыарыллыбытын ыйар анал бэлиэлэри нэдиэлэ устата иилиэхтэрэ. Бу сырыыга чипирование сүрүн үлэтин Булуҥнааҕы тыа хаһаайыстыбатын  управлениетын зоотехнига Петр Захаров иилээн-саҕалаан ыытыа. Кини былырыын табаларга анал бэлиэлэри туруорааһыҥҥа бэйэтинэн сылдьан үлэ сүрүнүн, тугун-ханныгын билбит, көрбүт уопуттаах. Ону таһынан кини Дьокуускай куоракка табаҕа бэлиэлэри сөптөөхтүк иилэргэ анал үөрэҕи ааспыт.

Бэлиэлэр  нүөмэрдэрдээх  буоланнар, ахсаан  кэмигэр көмөлөөх буолуо диэн Булуҥнааҕы тыа хаһаайыстыбатын  үлэһиттэрэ бэлиэтииллэр. 2019 сыл күһүҥҥү ахсаан кэмигэр аны “Бороҕоннооҕу”  МУТ табаларыгар маннык бэлиэлэр туруоруллаллара күүтүллэр.

Тыа хаһаайыстыбатын салайааччыта Ефрем Матвеев:

— Улуус табаларыгар анал нүөмэрдээх бэлиэлэри туруорааһынын үлэтэ иккис түһүмэҕэ былаан быһыытынан бу күннэргэ саҕаланна. Булуҥҥа баар үс улахан муниципальнай унитарнай тэрилтэлэр (“Бороҕоннооҕуга”, “Приморскайдааҕыга” уонна “Булуҥнааҕыга”) табалара булгуччу бары анал бэлиэлээх буолуохтаахтар. “Бороҕоннооҕу” МУТ табаларын бэлиэлээһининэн үлэ түмүктэниэ.

Чипирование үлэтэ тыа хаһаайыстыбатын салаатыгар табыгастаах кэмҥэ ыытыллара ордук. Үлэ дьонун хас сырыы аайы мунньа сылдьыбат туһуттан бэлиэтээһин ахсаан кэмигэр, табалары вакцинациялааһын,  хаан ылааһын курдук сүрүн тэрээһиннэри кытта сөп түбэһиннэрэн, оҥоһуллар.

Ааптар: Харысхан ПОПОВ

Хаартыскалары Руслан Лукин тиэрдиитэ.

Источник: «Газета "Маяк Арктики"»  


Количество показов: 38


Возврат к списку
Обратите внимание

Другие новости текущего источника информации