Дьаархаҥҥа спорт былаһааакката аһылынна

Дьаархаҥҥа спорт былаһааакката аһылынна | Администрация МР Нюрбинский район
12.06.2019
Количество показов: 33

Бүгүн күнүс 14 чаастан Дьаархаҥҥа спорт былаһаакката үөрүүлээхтик аһылынна. Күүтүүлээх саҥа эбийиэк үлэҕэ киириитэ Ньурба улууһугар Арассыыйа күнүн биир кэрэ-бэлиэ түгэнинэн буолла. Үөрүүлээх тэрээһиҥҥэ нэһилиэк олохтоохторо, улуус дьаһалтатын эппиэттээх үлэһиттэрэ Вероника Кириллова, Лариса Николаева, Ньурба к. баһылыга Александр Иванов, Чаппанда нэһилиэгин баһылыга Краснослав Бухолов, улуустааҕы ыччат бэлиитикэтин управлениетын исписэлииһэ Прокопий Чымыров уо.д.а. кытыннылар.

Дьаархан нэһилиэгин баһылыга Павел Александров иһитиннэрэринэн, бу эбийиэк олохтоох көҕүлээһиннэри өйүүр бырагыраама чэрчитинэн тутуллан үлэҕэ киирдэ. Хаһаайыстыбаннай ньыманан олохтоох дьаһалта уонна нэһилиэнньэ күүһүнэн тутулунна. СӨ Спорт министиэристибэтэ биэрбит 7 тренажердарын таһынан, "Трамплин" ХЭТ эбии тренажердары аҕалбыта. Спортивнай хонуута нэһилиэк кэлим социальнай-экэнэмиичэскэй сайдыытыгар көмө харчытын суотугар оҥоһуллубута. Олохтоохтортон 3 биригээдэ тэриллэн үлэлээтэ. Марха муостатын тутуутугар уонна муостаҕа киириигэ суолу оҥорор "Сибмост" ХЭТ уонна "Сахадороги" тэрилтэ көмөлөстүлэр. Былаһаакка искусственнай хонуутун "Попов" ИП аҕалбыта.

Маннык силигэ сиппит саҥа спорт былаһаакката мээнэ нэһилиэккэ суох. 120 м усталаах сүүрэр дорожкалаах, футбол, волейбол уонна баскетбол оонньонор универсальнай хонуулаах, 40 киһи олорор миэстэлээх, пластиковай сидиэнньэлээх трибуналаах уонна 10-тан тахса уличнай тренажердаах. Итинэн үлэҕэ-хамнаска олус көхтөөх нэһилиэк олохтоохторо спордунан дьарыктаналларыгар уонна доруобуйаларын тупсарыналларыгар анаан, бэртээхэй эбийиэк ситэриллэн үлэҕэ киирдэ.

Спорт былаһаакката аһыллар тэрээһинигэр тоҕооһуннаран, футболга күрэхтэһии ыытылынна. Мархаттан, Чаппандаттан, Антоновкаттан уонна Дьаархантан барыта 6 хамаанда күрэхтэстэ.

Ааптар: Геннадий Антонов.


Количество показов: 33


Возврат к списку
Обратите внимание

Другие новости текущего источника информации
Загрузка