1Күүлэт 100 сыллаах ыһыаҕа

1Күүлэт 100 сыллаах ыһыаҕа | Администрация МР Вилюйский район
17.07.2019
Количество показов: 23

Бастакы Күүлэт  Хампа буолаһыттан арахсан, Мастаах буолаһыгар холбоһон “1 Күүлэт” нэһилиэгин быһыытынан тэриллэн үлэлээбитэ 100 сылын бэлиэтиир “Үрүҥ тунах ыһыаҕын”  Бастакы Күүлэттэр дэлэччи тэрийэннэр икки күн устата  туура тэбинэн тураннар ыһыахтаатылар.

Ыһыахха 1 Күүлэттэн төрүттээх дьон, ыалдьыттар ыраахтан-чугастан суол ырааҕын аахсыбаккалар,  сүүс сыллаах үбүлүөйдээх ыһыахха сылдьан биир дойдулаахтарын кытта ирэ-хоро  көрсөннөр ахтылҕаннарын таһаараннар, төрөөбүт төрүт буордарыттан күүс –сэниэ ыланнар кэтэһэн турар күүстээх үлэлэри үмүрүтээрилэр, сахалыы таҥас эгэлгэтин  киэргэнэ кэтэннэр,  ыһыахтарын ыстылар.

Нэһилиэк Ыһыахха тэриниитин  аартыгыттан саҕалаабыт. Аартыктан саҕалаан хас уулусса ахсын үбүлүөйү кэпсиир улахан баннердар ыйаммыттар. Дэриэбинэ кырдьаҕас  урукку Мир уулусса саҕаланыаҕыттан бүтүөр диэри уот баҕаналарыгар саламаны ыйаабыттар. Ыаллар олбуордарыгар нэһилиэк кырдьаҕастарын хаартыскаларын, киэн туттар дьоннорун туһунан өҥнөөх баннердары дэлэччи ыйаан уулуссаларын киэргэппиттэр.

Ыһыахтыыр сирдэрин, саҥа тутуллан киирбит кулууп аннынан көнө ньуурдаах Уһун күөл ходуһатыгар ыһыахха ирдэнэр бары атрибутиканы тутуһаннар, киэргэппиттэр. Манна  нэһилиэк сүүс сыл иһигэр ситиспит историятын кэрчигин кэпсиир информационнай стендэтэ үгүс киһи болҕомтотун тутта.

 Түһүлгэни нэһилиэккэ олохсуйан тэнийбит аҕа уустарын  түөлбэлэринэн эргиппиттэр.  Ыһыах аһыллыыта ол аҕа уустар анаммыт түөлбэлэринэн тарҕаһаннар уот оттонор алгыс кээһэллэринэн, алгысчыт, Егор Васильев, алгыстыырынан саҕаланна. Алгыс түспүтүн кэннэ “Үйэни уҥуордаан” диэн ааттаах  киэҥ ис хоһоонноох театрилизованнай көстүүнү  олохтоохтор туруораннар нэһилиэктэрин сайдыыларын кэрчигин көрдөрдүлэр.

1Күүлэт 100 сылын бэлиэтиир ыһыаҕын  Бүлүү улууһун баһылыга, Сергей Николаевич Винокуров, эҕэрдэ тылын эттэ уонна  Ил Дархан,  Айсен Сергеевич Николаев, Эҕэрдэ суругун доргуччу ааҕан туран ыһыаҕы арыйда.  Салгыы үбүлүөйүнэн сибээстээн  күүлэт дьонугар элбэх правительство, министерстволар, улуус үрдүкү наҕараадаларын үөрдэ-көтүтэ  туттартаата.

Сиэр быһыытынан, ыһыахха кэлбит күндү ыалдьыттар, нэһилиэктэр баһылыктара,  ыҥырыылаах ытык ыалдьыттар ыһыах дьонун ытыстарын доҕуһуолун ортотугар аар баҕах тойон сэргэни туруоруу сиэрэ-туома оҥоһулунна.  Дьэ бу кэнниттэн күргүөм оһуохайы тоҕо тардан сүүһүнэн киһи кыттыылаах улахан түһүлгэнэн оһуокайа таҕыста.

Ыһыах икки күн устата барада. Ол тухары ас-үөл дэлэччи аһанна. Ол тухары араас спортивнай, культурнай тэрээһиннэр тигинэччи тохтоло суох ыытылыннылар. Ол тухары кыайыылаахтарга сыаналаах бириис арааһа туттарылынна. Икки күн устата  улуустааҕы спорт управлениятын салайааччыта, айылҕаттан дэгиттэр талааннаах диктор Гаврил Евсеев, биирдэ да кэлэҕэйдээн ылбакка  Күүлэт Боотуру, ат сүүрүүтүн, спортивнай оонньуулары коментарийдаан, кэпсээн-ипсээн күүлэттэри дуоһутта, ыһыаҕы киэргэттэ.

Күүлэт ыһыаҕар анаан улуустааҕы ат сүүрүүтүн федерацията  Дьөккөн, Тааһаҕар, Халбаакы боруода сүүрүк аттарын таһаараннар олус кыраһыабай  сүүрүүлэрин көрдөрөннөр күүлэттэри сөхтөрдүлэр.

Бүлүү улууһун пресс сулууспата

  

 

 


Количество показов: 23


Возврат к списку
Обратите внимание

Новости