Эдьигээҥҥэ "Сыатаа" община табалара чииптэннилэр

Эдьигээҥҥэ "Сыатаа" община табалара чииптэннилэр
14.10.2019
Количество показов: 86

     Биллэрин курдук таба ыстаадаларыгар сылга иккитэ сааскы төрүөх кэнниттэн уонна күһүн ыстаадалар сайылаабыт сирдэриттэн кыстыыр базаларыгар көһөр кэмнэригэр харааллааһыны, ол эбэтэр таба ахсаанын чуолкайдааһыны ыыталлар. Эдьигээҥҥэ күһүҥҥү ааҕыыны тыа хаһаайыстыбатын управлениета тэрийэн дьаһайар. «Сыатаа» таба иитэр общинаҕа балаҕан ыйын бүтүүтэ 365 табаҕа чиип туруордулар.

     Хараал кэмигэр управлениеттан, нэһилиэктэр дьаһалталарыттан тыа хаһаайыстыбатын исписэлиистэрэ бары ыстаадаларынан сылдьарга сорудахтаналлар. Ону сэргэ харааллааһыҥҥа ветеринарнай управление исписэлиистэрэ эмиэ кыттыыны ылаллар. Тыа хаһаайыстыбатын управлениетын сүрүн исписэлииһэ Р.П. Егоров быйылгы таба ааҕыытыгар «Сыатаа» таба иитэр община сайылыыр базатыгар тиийэ сырытта, үлэни -хамнаһы билистэ. Ол туһунан кини маннык кэпсээтэ:

     — «Сыатаа» таба иитэр общинаны Сергеев Александр Николаевич салайар. Кинилэр Мэҥкэрэ үрэх үрдүгэр сайылыыр базалаахтар. Манна табаһыттар үс балааккаҕа уонна киэҥ-куоҥ ураһаҕа олороллор. Мас каркаска матырыйаалы бүрүйэн сайыҥҥы куукуна оҥостубуттар. Бородууктанан хааччыллыылара үчүгэй, килиэптэрин бөһүөлэктэн аҕалтараллар, оннооҕор сибиэһэй оҕуруот аһыттан салаат оҥостоллор. Оройуон дьаһалтата атыылаһан биэрбит рациялаахтар, онон сибээһи тутуһа олороллор. Күн уотуттан энергия ылар аныгы дьоҕус станциялаахтар. Чуум үлэһитэ Анастасия Константиновна: «Итинтибит олус абыраллаах тэрил. Куйаас күннэргэ отуу оттон түбүгүрбэккэ, билиитэни уокка холбоон, аспытын астанабыт. Оннооҕор сайын оҕо элбэҕэр, таҥас сууйар массыынаны туһанан таҥаспытын начаас эрийтэрэн ылааччыбыт. Быйыл сайын бэйэбит сиэннэрбитин уонна аймахтарбыт оҕолорун аҕалан, лааҕыр курдук сынньаттыбыт. Сайыммыт кураан уонна сылаас буолан, хата оҕолор сөтүөлээн, күҥҥэ сыламнаан абыраннылар. Балыктаатылар, табаны кытта бодьуустастылар, арай сир аһа урукку дьыллааҕар быйыл мөлтөх буолла», — диэн кэпсиир. Кыстатыамтан саамай чугас сытар ыстаада буолан, мотуорканан Александр Николаевич бэйэтинэн арыаллаан, сыыдамнык айаннаан балаҕан ыйын 24 күнүгэр тиийбиппит. Тиийиэхпититтэн ардаҕа суох сөрүүн күннэр тураннар, сорукпутун барытын толордубут. Ыстаада табаһыттара Ильинов Семен Ильич, Михайлов Николай Михайлович, Сергеев Николай Александрович, Ильинов Анатолий Аполлонович бары да туохтан да толлон турбат, олус бүгүрү, сатабыллаах дьон. Табаларын хараалын Мохсоҕоллоох диэн сиргэ туппуттар, онно аахтыбыт. Сайылыктан 20-чэ мүнүүтэ сатыы хааман тиийэбит. Билигин ардах, үөн-көйүүр суох буолан, сорох табалар ыраата барбыттарын, табаһыттар кыайан булбатылар. Балаҕан ыйын 24-29 күннэригэр барыта 365 табаҕа чиип туруордубут.

 

     Харааллааһын хампаанньата ахсынньы саҥатыгар түмүктэнэр, онон ити кэмҥэ диэри община табатын ахсаана чуолкайданыаҕа. Табаны чииптээһин, биллэрин курдук, биһиги оройуоммутугар ааспыт күһүҥҥүттэн саҕаламмыта. Ааспыт сыл Лииндэ эҥэринэн маршруттанар «Баахынай» община табалара бары чиип кэппиттэрэ. Аны билигин Кыстатыам общиналарын табаларын чииптээн бүтэрэр сорук турар. Ол иһин «Тугут», «Мэйээн» общиналар сайылыыр сирдэригэр «Кыстатыам» ЭМТ тыа хаһаайыстыбатыгар исписэлииһэ Шадрин Владимир Анатольевич, ветеринарнайуправление эдэр үлэһитэ, ветврач Андреев Денис Викторович вертолетунан көппүттэрэ. Манна даҕатан эттэхпинэ, община баһылыга Александр Николаевич: «Сайын устата бэтэринээр кэлэрин кэтэстибит да, сонон кэлбэтилэр. Дьиҥэ сайын хайаан да бэтэринээр ыстаадаҕа тахсан, табалары саастарынан уонна аналларынан наардаан, туһааннаах эмтиир-сэрэтэр үлэни ыытыахтаах, оччоҕо эрэ таба кыстыгы этэҥҥэ туоруур туруктанар буоллаҕа. Биһиги ыстаадабытыгар кэлии-барыы кыаллар, мотуорканан сылдьарга табыгастаах сиргэ сайылыыр. Ону бэтэринээрдэрбит таба туһамматтар», — диэн хом санаалаах илдьитин тиэрдэр, — итинник кэпсээтэ Руслан Прокопьевич.

     Бэйэтэ ветеринар идэлээх буолан, Руслан Прокопьевич ити сылдьыбыт кэмигэр табалар туруктарын көрдө-иһиттэ. Куйуктаны утары укуол туруорда. Мөлтөх соҕус туруктаах табаларга иммунитеттарын күүһүрдэр битэмииннээх быһыылары биэрдэ. Оттон табаһыттар кыстыыр сирдэригэр Дьааҥы хайаларын диэки табаларын үүрэн барарга бэлэмнэнэн, түбүгүрэллэр.

«Эдьигээн сонуннара» хаһыат.

http://ulus.media/2019/10/12/edigee-e-syataa-obshhina-tabalara-chiiptenniler/





Рубрика:  Общество
Регион:  Жиганский
Источник информации:  Администрация МР Жиганский район
Количество показов: 86
Рубрика: Общество Район: Жиганский Источник информации: Администрация МР Жиганский район
Дата публикации: 2019-10-14 12:39:17
Дата изменения: 2020-02-13 17:16:34 Опубликовано на сайте: СахаТаймс - информационно-справочный портал Республики Саха (Якутия)



Новости района: Жиганский 

Новости рубрики "Общество"
Компания Инфомастер

Возврат к списку
 -