НУОРАҔАНАҔА ЫЫТЫЛЛЫБЫТ "ҮЛЭ КҮҮҺЭ" ТЭРЭЭҺИҤҤЭ КЫРДЬАҔАСТАРГА ОТТУК МАС БЭЛЭМНЭННЭ

НУОРАҔАНАҔА ЫЫТЫЛЛЫБЫТ "ҮЛЭ КҮҮҺЭ" ТЭРЭЭҺИҤҤЭ КЫРДЬАҔАСТАРГА ОТТУК МАС БЭЛЭМНЭННЭ
11.04.2019
Количество показов: 175

Нуораҕанаҕа Арыылаахтан төрүттээх Мэхээлэлэр ‒ үлэ бэтэрээннэрэ, убайдыы-бырааттыы Михаил Иванович, Михаил Федорович Борисовтар  сырдык ааттарын үйэтитэр «Үлэ күүһэ ‒ 2019» тэрээһин үрдүк таһымнаахтык ыытылынна. 

Нуораҕана нэһилиэгин баһылыга Сергей Сергучев дойдуларын туһугар үлэлээн-хамсаан ааспыт үлэ дьонун өрө тутар сыаллаах бастакытын ыытыллар үлэ  күнүн бырааһынньыгынан олохтоохтору, ыалдьыттары уонна күрэхтэһэ кэлбит эр хоһууннары эҕэрдэлээтэ. Нөмүгүтээҕи килиэп собуотун генеральнай дириэктэрэ, СӨ Бочуоттаах мэссэнээтэ Вячеслав Нестеров Ил Түмэн дьокутаата Руслан Федотов аатыттан СӨ Ил Түмэнин өрөспүүбүлүкэ социальнай-экономическэй сайдыытыгар кылаатын иһин Бочуотунай грамоталары Иннокентий Киренскэйгэ, Анатолий Борисовка, Михаил Нестеровка туттарда. Вячеслав Анатольевич олохтоох мэхэньисээтэр Михаил Нестеровка уопсай үлэҕэ туттарга анаан 6 сэнтиниэр  сэлээркэҕэ сэртипикээти  туттарда.

Евдокия Семеновна кэргэнин Михаил Федорович Борисов туһунан иһирэх ахтыы оҥордо. Михаил Иванович уонна Михаил Федорович Борисовтар аймахтара, РФ уопсай үөрэхтээһинин Бочуоттаах үлэһитэ, СӨ бочуоттаах бэтэрээнэ, улуус, Дьабыыл нэһилиэгин бочуоттаах олохтооҕо, «Дьабыыллар кэрэ эйгэтигэр», «Дьабыыллар үлэ үөһүгэр» кинигэлэр ааптардара Татьяна Тимофеева Мэхээлэлэр туруу үлэһиттэрин, илиилэригэр-атахтарыгар кыаналларын, олохторун-дьаһахтарын  сиһилии  сырдатта. «Михаил Федорович 45 сыл суоппардаабыт, аҕата, эһэтэ тимир, мас уустара этилэр. Бэйэтэ элбэхтик тустара, оҕолорун успуортка уһуйбута. Онон кини ыччатыгар успуордунан дьарыктамматах, ситиһиилэммэтэх киһи суох», — диэтэ.

Өрөспүүбүлүкэҕэ быйыл Сомоҕолоһуу сылынан ыаллыы сытар нэһилиэктэр кыттыылаах дьиҥнээх үлэ бырааһынньыга  тэрилиннэ. Төҥүлүттэн «Төҥүлү хоһууттара» (салайааччы Гаврил Петров), Балыктаахтан «Добун» (Михаил Барабанов), Тумултан «Нал» (Власий Кириллин), Чурапчы Чыаппаратыттан “Боотур” (Илья Протодьяконов), Нуораҕана бастакы хамаандата ДьУоКХ “Хоһуун” (Василий Канаев), иккис хамаандата “Дьулуур” (Михаил Баишев) олохтоох дьаһалта үлэһитэ Семен Аммосов салайыытынан барааттаан киирдилэр. Тэрээһини сүрүн тэрийээччи Вячеслав Нестеров 4 сэнтиниэр сэлээркэнэн хааччыйан, нэһилиэк эр дьонун күүһүнэн эрдэ субуотунньугунан бэлэмнэммит тиит маһы 12 “лесовоһунан” киллэрэн бэлэмнээбиттэрин, хамаандалар  бириэмэҕэ эрбээн саһааннаатылар. Бу саһааннанан бэлэмнэммитинэн 140 кууп мас нэһилиэк кырдьаҕастарыгар, инбэлииттэригэр көмө быһыытынан тиэллиэхтээх.

Василий Канаев салайааччылаах ДьУоКХ Нуораҕана-1 «Хоһуун» хамаандата 1 чаас 10 мүнүүтэ көрдөрүүлээх бастаан, «Штиль» эрбиинэн наҕараадаланна. Иккис миэстэҕэ Михаил Баишев салайааччылаах Нуораҕана-2 «Дьулуур» хамаандата 1 чаас 15 мүнүүтэнэн түмүктээн шуруповерт, үһүс миэстэ ыаллыы Илья Продьяконов салайааччылаах Чыаппара хамаандата 1 чаас 25 мүнүүтэни көрдөрүүлээх болгарка эрбиинэн, устурууһунан наҕараадаланнылар. Атын кыттыбыт хамаандалар биһирэбил бириистэри туттулар. Хамаандалар аҕа саастаах кыттааччылара Владимир Шеломов (Чыаппара), Иннокентий Курчатов (Нуораҕана) 10-нуу тыһ.солк.  Николай Семенович Харитоновтан, Сергей Харитонов (Балыктаах) Петр Александрович Харитоновтан 5-тии тыһ.солк. сэртипикээттэри туттулар. Күрэхтэһии кылаабынай судьуйатынан Юрий Никифоров, хамаандаларга олохтоох «Аартык” ыччат түмсүүтүттэн волонтердар үлэлээтилэр.

Нэһилиэккэ ыытылла турар «Эйгэ ситимэ» бырайыак чэрчитинэн Аҕа сүбэтин тэрийиитинэн аҕа уолунуун ох саанан сыал ытыытыгар күрэхтэһии ыытылынна. Күрэхтэһиини Федор Киренскэй судьуйалаан ыытта. Манна Григорий, Арсен Жирковтар бастаатылар, Иван, Кеша Киренскайдэр иккис, Геннадий, Дьулус Самойловтар үһүс бириистээх миэстэлэри ыллылар.

Сыаналаах бириистэринэн оонньоммут лотереяттан киирбит 150 тыһыынча солкуобайы сүрүн тэрийээччи Вячеслав Нестеров  олохтоох дьаһалта баһылыгар Сергей Сергучевка баанньыгы саҥардан оҥорууга туттарда. Супер бириис ‒ холодильник хаһаайынынан Николай Баишев буолан, үөрүү өрөгөйүн биллэ. Тэлэбиисэри Федора Борисова, МР саалары Саргылаана, Станислав Петровтар, Елена, Анатолий Борисовтар о.д.а. сыаналаах бириистэри сүүйэн  дьон-сэргэ үөрдэ-көттө.

Нөмүгү кэмбинээтэ минньигэс бородууксуйаларынан ыалдьыттары күндүлээн, тото-хана аһатта. Хамаандалары олохтоох дьаһалта итии миининэн хааччыйда.

Нэһилиэк баһылыга Сергучев тэрийээччилэргэ махтанан туран, Вячеслав Нестеровка, Федор Борисовка, Руслан Федотовка уонна Валентина, Михаил Нестеровтарга Махтал суруктары, сэмэй бэлэхтэри ытыс тыаһын ортотугар туттарда. Олохтоохтор, ыалдьыттар бары тэрээһинтэн астынан тарҕастылар.

Көҕүлээччилэринэн уонна успуонсардарынан Михаил Иванович сиэнэ, Нөмүгүтээҕи килиэп собуотун генеральнай дириэктэрэ Вячеслав Нестеров, Михаил Федорович уола Федор Борисов дьиэ кэргэнэ, Ил Түмэн дьокутаата, предприниматель Руслан Федотов уонна «Дьабыыл нэһилиэгэ» МТ дьаһалтата буоллулар.

Ааптар: Марелла Баишева.





Рубрика:  Общество
Регион:  Мегино-Кангаласский
Источник информации:  Администрация МР Мегино-Кангаласский район
Количество показов: 175
Рубрика: Общество Район: Мегино-Кангаласский Источник информации: Администрация МР Мегино-Кангаласский район
Дата публикации: 2019-04-11 17:28:21
Дата изменения: 2020-02-13 17:34:26 Опубликовано на сайте: СахаТаймс - информационно-справочный портал Республики Саха (Якутия)



ТОП-10*: Общество
* - по количеству просмотров за месяц

Новости района: Мегино-Кангаласский 

Новости рубрики "Общество"
Компания Инфомастер

Возврат к списку