НЬУРБА ТЫЙААТЫРЫН БАСТАКЫ СЫБААЙАТА ТҮҺЭРИЛИННЭ

НЬУРБА ТЫЙААТЫРЫН БАСТАКЫ СЫБААЙАТА ТҮҺЭРИЛИННЭ
19.07.2019
Количество показов: 240

От ыйын 17 күнүгэр СӨ Ил Дархана Айсен Николаев Ньурбаҕа оробуочай сырыытын кэмигэр улууска улахан историческай суолталаах түгэн буолла. Ньурба куоракка 250 миэстэлээх тыйаатыр дьиэтин бастакы сыбаайатын үөрүүлээх быһыыга-майгыга түһэрдилэр.

53 сыл устата кэтэһиилээх эбийиэк буолан, дьэ тутуута саҕаланарыгар Ньурба дьоно оҕолуун-улаханныын, эдэрдиин-эмэнниин бэрт элбэх киһи кэлэн тоҕуоруһа муһунна.

 

Үөрүүлээх тэрээһиҥҥэ Айсен Николаевы арыаллаан сылдьар СӨ Бырабыыталыстыбатын Бэрэссэдээтэлин солбуйааччыта Денис Белозеров, СӨ Бырабыыталыстыбатын чилиэннэрэ, Ил Түмэн Бэрэссэдээтэлин солбуйааччыта Антонина Григорьева, Ил Түмэн сис кэмитиэттэрин бэрэссэдэтэллэрэ Феодосия Габышева, Владимир Прокопьевуо.д.а. кытыннылар. СӨ үтүөлээх артыыһа Борис Борисов аал уоту айах тутан, алҕаан сахалыы сиэри-туому ситэрдэ. 

Айсен Николаев 2 сылынан Ньурбаҕа Дьокуускай куорат тыйаатырдарыттан хаалсыбат тупсаҕай оҥоһулаах эбийиэк үлэҕэ киириэҕин, бу Ньурба улууһугар эрэ буолбакка, бүтүн Саха сирин арҕаа өттүгэр култуура сайдыытыгар улахан оруоллаах буолуохтааҕын бэлиэтээтэ. Салгыы улуус баһылыга Алексей Иннокентьев уонна Ньурбатааҕы тыйаатыр уус-уран салайааччыта Юрий Макаров тыл эттилэр, бу дьоһун суолталаах эбийиэк тутулларынан өрөспүүбүлүкэ салалтатыгар истиҥ махталларын уонна мустубут дьоҥҥо иһирэх эҕэрдэлэрин тиэртилэр.

Тутааччылар үөрүүлээх-өрөгөйдөөх ытыс тыаһын ортотугар тыйаатыр маҥнайгы сыбаайатын түһэрдилэр. Бу түгэҥҥэ ситиһиилээх үлэтинэн Саха сиригэр эрэ буолбакка, бүтүн Арассыыйа үрдүнэн биллэр-көстөр тыйаатыр үлэһиттэрэ эрэ буолбакка, бүгүн мустубут дьон барыта сүрэхтэрэ улахан үөрүүнэн-дьолунан туолла. Дойдуларын ханнык баҕарар улахан сыанаҕа дьоһуннук ааттата сылдьар үтүөлээх артыыстарбыт хомоҕой хоһооннорун аахтылар.

 

Бу курдук бүгүҥҥү күн Ньурба улууһун өр сыллаах историятыгар биир чаҕылхай түгэн быһыытынан хаалыаҕа.

Ааптар: Геннадий Антонов





Рубрика:  Общество
Регион:  Нюрбинский
Источник информации:  Администрация МР Нюрбинский район
Количество показов: 240
Рубрика: Общество Район: Нюрбинский Источник информации: Администрация МР Нюрбинский район
Дата публикации: 2019-07-19 15:41:10
Дата изменения: 2020-02-13 19:11:16 Опубликовано на сайте: СахаТаймс - информационно-справочный портал Республики Саха (Якутия)



Новости района: Нюрбинский 

Новости рубрики "Общество"
Компания Инфомастер

Возврат к списку