ГОРНАЙГА АҔА КЫЫҺЫНААН КЫАЙАН МР-156 СААНАН НАҔАРААДАЛАННЫЛАР

ГОРНАЙГА АҔА КЫЫҺЫНААН КЫАЙАН МР-156 СААНАН НАҔАРААДАЛАННЫЛАР |  | Уполномоченный по правам ребенка
17.04.2019
Количество показов: 70

Өрөспүүбүлүкэҕэ бэлиэтэнэр Аҕалар күннэрин, Маҥаны нэһилиэгэ төрүттэммитэ 125 сылын көрсө Горнайга аан маҥнайгытын «Аҕа кыыһынаан» куоҥкурус-күрэс Орто-Сурка ыытылынна. Аны мантан ыла Аҕа аата, кини дьиэ кэргэҥҥэ оҕону иитиитин оруола үрдүктүк тутуллар, сыаналанар буолуо диэн санаа үөскүүр.

Куоҥкурус ирдэбилинэн аҥардас кыыс эрэ оҕолоох аҕалар кытыннылар. Ол курдук, Бэрдьигэстээхтэн  Максимовтар, Атамайтан Аввакумовтар, Маҥаныттан Алексеевтар, Варламовтар, Бүлүү Чинэкэтиттэн Орлосовтар, Мытаахтан Егоровтар кэлэн көхтөрүн түмтүлэр. Тэрээһин үөрүүлээх арыллыытыгар нэһилиэк аҕа баһылыга Михаил Текеяновбары аҕаларга истиҥ эҕэрдэтин анаата. Онтон СӨ Аҕалар лигаларын салайааччыта Айхал Габышев эҕэрдэ тылын видеонан тириэртэ.

Бу бырайыак ааптардарынан 4 кыыс оҕолоох аҕа Семён Никифоров уонна Горнай улууһун «Дохсун» аҕалар түмсүүлэрин салайааччыта Ариян Александров буолаллар.

Куоҥкурус бастакы түһүмэҕинэн дьиэ кэргэттэр араас интэриэһинэй дьарыктаах буолууга, эбии дохуот киллэрииниигэ, иитии үгэстэригэр о.д.а бырайыактарын көмүскээтилэр. Холобур, кыһыҥҥы теплица, куруолугу иитии, ынах-сылгы иитиитин кэпсээтилэр.

«Төгүрүк остуолга»  билиҥҥи уопсастыбаҕа аҕа оруолун үрдэтии тула кэпсэтиилэр, ырытыылар буоллулар. Горнайдааҕы дьэ кэргэҥҥэ уонна ыччакка психологическай көмөнү оҥорор киин салайааччыта Сахаайа Платонова,кыыс оҕону иитиигэ туһуланар сүбэлэри биэрдэ.

Үөрүүлээх күҥҥэ бэйэлэрэ ураты көрүүлээх, актыыбынай аҕаларга «Лига отцов» түмсүү  наҕараада туттарда: С.К.Никифоровка, Е.В.Оленовка, В.И. Поповка.

Бу күн аҕалар маннык уопсастыбаҕа тахсаллара, бэйэлэрин дьоҕурдарын, талааннарын көрдөрөллөрө ураты истиҥ көстүү буолла.

Дьүүллүүр сүбэ быһаарыытынан: «Бастыҥ бырайыак» Максимовтар (Бэрдьигэстээх), «Бастыц хаһаайын» Алексеевтар (Маҥаны), «Бастыҥ талаан» Варламовтар (Маҥаны), «Истиҥ сыһыан» Егоровтар (Мытаах)  буоллулар. Икки бастыҥ дьиэ кэргэнинэн Орлосовтар (Чинэкэ) уонна Аввакумовтар (Атамай) ааттаннылар. Орлосовтар Горнай улууһун баһылыга Н.В.Андреев  олохтообут 10 000 солк. суумалаах сертификатынан, Аввакумовтар (Атамай) МР-156 саанан наҕараадаланан үөрдүлэр. Бу бирииһи «Аартык» аҕалар түмсүүлэрэ олохтоото. Кыыһыгар бырайыак ааптара Семён Никифоров 5000 солк. уу харчынан бириэмийэ туттарда.

Ааптар: Анастасия Максимова

http://ulus.media


Количество показов: 70

Возврат к списку
Обратите внимание

Другие новости текущего источника информации